1-ва Скопска - МТМ Телевизија

Откако деновиве во медиумите се актуелизираше темата околу изградба на висококатници на зелени површини во Аеродром, со свој став излезе и градоначалникот на општината.

Во соопштение, општина Аеродром информира дека градењето на деветкатница на плацот пред Мајчин дом е спротивно на заложбите на сегашното општинско раководство. Во Опшината досега не е пристигнато барање за одобрение за градба, ниту какво било барање во однос на конкретната парцела и согласно тоа не постои проектна документација за објектот, велат од Аеродром, и појаснуваат дека со ДУП И10, изгласан од претходното раководство во април 2017 година, парцелата пред Мајчин Дом се наменува од зона Д1 – парковко зеленило во зона за станбено домување А2.

Во тој период имаше голем број реакции од јавноста во однос ДУП И10 и сегашниот градоначалник јавно говореше против носење на одлуката парцелата да се претвори во градежна. И покрај големите заложби против ваквото решение, претходното раководство го донесе ДУП И10, кој е веќе стапен на сила, потенцираат од општина Аеродром.

Парцелата пред Мајчин Дом е во приватна сопственост. Според деталниот урбанистички план, тука се предвидува иградба на објект кој вклучува приземје, плус осум ката и поткровје.

Општина Аеродром во моментов ги разгледува сите правни механизми и бара начин да ја спречи градбата на плацот пред Мајчин дом, завршуваат од општината.