1-ва Скопска - МТМ Телевизија

Советниците од Советот на општина Бутел на денешната седница донесоа одлука за формирање на Локален Совет за превенција. На оваа одлука и претходеше дискусијата на советниците и видео презентација на претставници од МВР и од ОБСЕ.

Локалниот Совет за превенција ќе брои 18 членови, а ќе биде предводен од градоначалникот на Општина Бутел, Велимир Смилевски и од командирот на полициската станица во Бутел. Целта на Локалниот Совет за превенција е да се подобри јавната безбедност и безбедноста во сообраќајот во општината, како и да се изгради доверба и партнерски однос помеѓу повеќе чинители во општината и општеството.

На денешната седница исто така беше донесена одлука за распишување на јавен повик за членови на Советот на млади на општина Бутел. Со одлука на Советот двете спортски сали во Радишани и во Живко Брајковски се ставаат во надлежност на Општина Бутел.

Советниците од о. Бутел на денешната седница ги усвоија сите предвидени точки од дневниот ред.