1-ва Скопска - МТМ Телевизија

Брзото темпо на живот, во комбинација со модерната технологија, честопати знаат да предизвикаат несакани ефекти во секојдневното функционирање. Паметните телефони, компјутерите и таблетите се почесто се замена за играчките на децата, уште од нивна најмала воздраст, што пак неретко значи намалена говорна функција кај децата, проблем кој се провлекува и по третиот роденден.

Дефектологот Ана Петреска од Интеракција Плус вели дека се поголем е бројот на деца кои имаат многу мал фонд на зборови дури и по третата година од животот, што според неа е последица на се пореткото читање сликовници и раскажување приказни, за сметка на цртаните филмови кои не придонесуваат за развој на говорните функции кај децата.

Ги прашавме и граѓаните што мислат за користењето на паметни телефони уште од најмала воздраст, и се уверивме дека се запознати со негативните последици од употребата на истите, но сепак, им дозволуваат и на нивните деца и внуци да ги користат, со цел да завршат некоја домашна обврска.

Фондот на зборови кои децата треба да го имаат развиено во периодот од втората до третата година е најмалку 50, но не сметајќи ги зборовите мама, тато, и најблиските челнови на семејството.

Еден од најдобрите и најпрепорачливи методи е посета на детска градинка, каде што има можност за постојана социјална интеракција со врсници.

За да се потврди дали детето има проблем во изучувањето на говорот, Петреска вели дека потребно е да се посети дефектолог, при што ќе се направи контролен преглед, и ќе се дадат упатства за понатамошен третман, доколку е потребен.

Здружението Интеракција Плус до 5ти јуни овозможува бесплатни логопедски прегледи за сите деца.