1-ва Скопска - МТМ Телевизија

Пехарот од Лигата на шампионките за ЖРК Вардар остана само сон. Нов пораз од Ѓер во финалето со 27-26 по продолженијата.

Ѓер го одбрани шампионскиот пехар во реприза од ланското финале со идентично сценарио. Вардар и во петтото по ред учество на Ф4 турнирот во Будимпешта остана без трофеј, играјки за последен пат во составот кој беше блиску да ја освои Европа и правата титула шампион на Европа. И двете страни беа со речиси идентични состави како и во ланското финале.

Вистинска драма се одвиваше во последната од регуларните 60 минути. Вардар со атракцијата на Лекиќ имаше водство од 20-19 и беше на 19 секунди до пехарот. Но, Аморин ја искористи воиграната акција на Ѓер за израмнување на 20-20, а Вардар не успеа во последниот напад и финалето продолжи со екстра време од 2 пати по 5 минути. Бразилката и македонска снаа беше движечка сила на Ѓер во продолженијата. Вардар застана со мислите за пропуштената можност, но пронајде мотиви да се врати и од три гола негатива, а Чаначија во последниот напад не успеа да изедначи за дополнителна драма и пенали во Будимпешта. Кај Вардар најдобра беше Лејно со 17 одбрани и го понесе признанието за МВП на турнирот. Лекиќ беше прв стрелец со 6 голови, Радичевиќ постигна 4. Кај Ѓер, Грот заврши со 8, а 6 гола придодаде Аморин.

Во мечот за 3.место ЧСМ Букурешт го победи Ростов Дон со 31-30. Што да се каже по оваа драма, ЖРК Вардар остана без својот сон, да стане европски шампион, а Македонија по 16 години повторно да се радува на титула во женскиот европски ракомет. Оваа генерација повеќе нема да се повтори, а ваква шанса којзнае кога пак ќе имаме.