1-ва Скопска - МТМ Телевизија

Министерството за финансии денеска потпиша договори со кои се овозможува и дава на располагање механизација  ровокопачи, што ќе ги користат 30 општини, со  грант обезбеден од Европската Унија.

Активноста се спроведува преку проектот за подобрување на општинските услуги, а е администриран и финансиски поддржан преку Светска банка, истакна министерот за финансии Драган Тевдовски кој  ги потпиша договорите со градоначалниците.

-Новата механизација ќе им овозможи на општините во секој момент да имаат на располагање маханизација за чистење речни корита, одрони или други проблеми за кои е потребна брза реакција. Вкупната вредност на грантот е над 46 милиони денари што значи дека со не толку висока сума може да се направи сериозен импакт и проект во функција на над 300.000 граѓани, истакна министерот Тевдовски и додаде дека со проектот за подобрување на локалните услуги моментно има реализација и на други полиња, односно се градат градинки, се подобруваат патишта низ различни општини и се градат други објекти за подобри услуги на граѓаните.

На промотивниот настан во Битола учествуваше и Никола Бертолини, раководител на Секторот за соработка во Делегацијата на ЕУ кој  ја истакна одличната соработката со Министерството за финансии.

– Овој проект е добар пример како ЕУ, Светска банка и Министерството за финансии овозможија бенефит за граѓаните. Овој проект е дел од нашата кампања „За чисто, како дома исто“ преку која се обидуваме да помогнеме на сите граѓани, нагласи Бертолини.

Според критериумите за учество во проектот и начинот на добивање на механизацијата, за да се добие еден ровокопач беше потребна заедничка апликација на три општини кои заеднички ќе го користат, информираа од Министерството за финансии.