Обезбедени дополнителни количини струја и топлинска енергија, АД ТЕ-ТО ќе работи по 20 часа на ден
- Детали
- Категорија: Бизнис
- Создадено: 13 Јануари 2022
На денешната седница Владата донесе одлука за преземање на мерка за обезбедување дополнителни количини на електрична енергија во услови на кризна состојба.
Со оваа одлука се предвидува дополнителните количини на електрична енергија да се обезбедат од домашно производство, односно од ТЕ-ТО АД Скопје.
„Друштвото за производство на електрична и топлинска енергија ќе работи седум дена во неделата во периодот од 5 часот наутро до 1 часот по полноќ со полна моќност, односно ќе го исполнува максимално инсталираниот капацитет од 227 мегавати“, се наведува во соопштението за владината одлука која стапува во сила денеска и ќе важи до крајот на месецот.
Во него се додава дека оваа дополнително произведена количина електрична енергија ќе ја откупува АД ЕСМ со сопствени средства.
„Со преземањето на дополнителните количини електрична енергија ќе се обезбеди производство и на топлинска енергија за регулираниот дистрибутер на топлинска енергија со што ќе се овозможи континуирано, квалитетно и економски исплатливо снабдување со парно греење на потрошувачите во Град Скопје и во исто време, при постоење на кризна состојба во снабдување со електрична енергија, ќе се овозможи да се заштедат природните ресурси кои АД ЕСМ ги користи за производство на електрична енергија“, посочуваат од Владата.
Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk
Можеби ќе ве интересира:
Сите статии објавени на МТМ.мк се во согласност со ИАБ етичкиот кодекс