1-ва Скопска - МТМ Телевизија

Министерот за економија, Крешник Бектеши, денес се сретна со новиот амбасадор на Косово, Флориан Ќехаја.

Министерот Бектеши му честита на амбасадорот Ќехаја за новата должност и му посака успех во текот на неговиот мандат.

Зголемување на билатералната трговија, реализација на заеднички инфраструктурни проекти, соработка во проекти за развој на туризмот и мерки за зголемување на економската соработка, кои ќе придонесат за создавање услови за раст на двете економии, беа главните теми на кои разговараа двајцата соговорници.

На состанокот беа разменети мислења и за мерките што ги презедоа двете соседни земји за соочување со енергетската криза, која го зафати регионот и светот, како и следните чекори во оваа насока, со цел постигнување поголема енергертска независност.

Министерот Бектеши истакна дека Република Косово е важен трговски партнер за Северна Македонија и е на 10. место на листата на земји со кои Македонија остварува најголем обем на трговска размена.

Според податоците од Државниот завод за статистика, минатата година остварен е значителен раст во вкупната трговија помеѓу Македонија и Косово од 43 %, при што извозот е зголемен 29,6 %, а увозот 137,2 %.

Во првите четири месеци од 2022 година остварена е вкупна размена во износ од 162,3 милиона евра, од кои 118,7 милиони евра се однесуваат на извоз во Република Косово, а 43,5 милиони евра се однесуваат на увозот од Република Косово. Во споредба со истиот период од 2021 година, вкупната размена е зголемена 49,7 %, извозот 40,4 % и увозот 82,7 %.

Бектеши и амбасадорот Ќехаја се согласија дека соработката меѓу двете земји ќе се продлабочува уште повеќе во иднина.