1-ва Скопска - МТМ Телевизија

Општина Ѓорче Петров и Хабитат преку субвенции и евтини кредитни линии ќе им помагаат на граѓаните за изградбата на енергетско ефикасни фасади и покриви на згради.

Токму за таа цел Општина Ѓорче Петров распиша Јавен повик за субвенционирање и поддршка на станбени згради за колективното домување со проектот „Енергетски ефикасни домови“ во Општина Ѓорче Петров. Субвенционирањето и поддршката ќе се врши со средства од Буџетот на општината за 2018 година. Пријавувањето е во тек и градоначалникот Александар Наумоски апелира до граѓаните да се пријават за да може да се направи селекција и да се определат средства  од Буџетот.

Субвенционирањето ќе биде поддржано со финансиски средства од буџетот на Општина Ѓорче Петров, во висина од 30%, но не повеќе од 1.000.000 денари од вкупниот износ на вредноста на инвестицијата за секоја одобрена апликација.

Право на учество на јавниот повик имаат сите Заедници на сопственици или Управители на станбени згради за колективното домување во Општина Ѓорче Петров кои се евидентирани во регистарот на станбени згради во општината и немаат долгови. Наумоски рече дека доколку има подготвени објекти кои имаат сменето 70% од прозорците и ги исполнуваат другите услови може веднаш да се започне со постапката за субвенционирање.

 Апликацијата за проектот „Енергетски ефикасни домови“ во Општина Ѓорче Петров може да се подигне во Архивата на Општина Ѓорче Петров или од официјалната веб страница на Општина Ѓорче Петров: www.opstinagpetrov.gov.mk. Пријавите треба да се достават до Општина Ѓорче Петров, најдоцна до 30.09.2018 година до 15:00 часот на последниот ден од завршувањето на Јавниот повик.

Според регистарот на згради, кој општината го направи со Хабитат, во Општина Ѓорче Петров има околу 250 згради, а околу 50% од нив може да влезат во проектот „Енергетски ефикасни домови“.