Италијанскиот јазик се поактуелен во училиштата во Скопје
- Детали
- Категорија: Карпош
- Создадено: 14 Декември 2018
Градоначалникот на Општина Карпош, Стефан Богоев се сретна со амбасадорот на Италија во Скопје, Карло Ромео.
На средбата се разговараше за актуелни случувања во Општина Карпош и продлабочување на соработката меѓу локалната самоуправа и амбасадата на Италија.Италијанскиот јазик, од оваа учебна година е воведен како втор странски јазик во основното образование во нашата држава и учениците веќе имаат можност да го изучуваат.
Градоначалникот Богоев и амбасадорот Ромео изразија подготвеност италијанскиот јазик од наредната учебна година целосно да се воведе во наставата во едно од основните училишта во Карпош, притоа да се запазат сите процедури и правила пропишани од Министерството за образование и наука. На овој начин, учениците од шесто одделение ќе имаат можност да се запознаат со особеностите на јазикот, но и со италијанската култура и традиција.
Инаку, изучувањето на странските јазици воопшто е од големо значење на децата. Наставниците велат дека, децата колку јазици знаат повеќе толку подобро. Во денешно време освен англискиот јазик кај децата се повеќе предизвикуваат внимание и други странски јазици, како италијански, германски и француски. Експертите велат дека децата колку порано ќе почнат да изучуваат странски јазик толку е подобро за нив.
Со години се сметало дека учењето странски јазик на деца на тригодишна возраст е бесполезно, но истражувањата го покажеле спротивното. Освен способноста да некому му го покажат патот или да си нарачаат храна во ресторан, учењето странски јазик има и неверојатни психолошки придобивки. Истражувањата покажуваат дека учењето нови јазици, го зголемува критичкото мислење, креативноста и флексибилноста во умот на децата.
Учениците кои учат странски јазик подобро решаваат стандардизирани јазични и математички тестови од оние кои не учат, што е показател дека учењето странски јазик е и когнитивна, а не само лингвистичка активност. Децата кои учат јазици додека растат развиваат и емпатија за другите, како и љубопитност за различни култури и идеи и се подготвени да си го најдат местото во едно глобално општество. Во подоцнежните години се зголемуваат и можностите за кариера за оние кои владеат со повеќе јазици.
Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk
Можеби ќе ве интересира:
Сите статии објавени на МТМ.мк се во согласност со ИАБ етичкиот кодекс