Во Мариово ќе се одржат јубилејните 35. Мариовско-Мегленски културни средби

Во манастирот „Свети Илија“, во прилепско Мариово, на 26 мај, в недела ќе се одржат јубилејните, 35. Мариовско-мегленски културни средби. На манифестацијата се среќаваат некогашните и сегашни жители на големото Мариово кои носталгично се потсетуваат на родниот крај, а секако ги канат и жителите на Меглен, од другата страна на границата со кои низ вековите одржувале блиски контакти и тргувале.

 

Според Стојан Ѓуровски, претседател на Здружението за организирање на Мариовско-мегленските културни средби, настаните за оваа традиционална манифестација почнуваат уште в четврток, на 23 мај во прилепската градска библиотека „Борка Талески“ каде од 19 часот ќе се прогласат најдобрите лични творби на претходно распишаниот конкурс на Средбите.

 

– Целта на овој анонимен традиционален награден конкурс е збогатување, негување на поетското творештво на двата региона и пошироко, смета Ѓуровски.

Главно, средбите ќе се одржат в недела, на 26 мај во мариовскиот манастир „Свети Илија“ со богата програма и настап на фолклорни групи од Прилеп, Битола, од Кавадарци, а за посетителите е организиран превоз.

 

– На средбите в недела е богатата културно-уметничка програма во која изобилува фолклорот, со што сакаме да го негуваме тоа народно богатство на регионите. Главно, целта на средбата е среќавање на иселените жители од Мариово и од Меглен, да се потсетатат на обичаите, на фолклорот, на архитектурата, на маките низ историјата што ги преживувале жителите, посебно од НОБ, со што сакаме да не се заборави, но и да не се повтори.

Здружението за организација на Мариовско-мегленските културни средби има и други активности. Во тек е подготовката на монографијата со наслов „35 години Мариовско-мегленски културни средби, 1984-2019 година“ со цел да се забележат сите активности на овие традиционални средби. Досега Здружението има иницирано научни средби за Мариово, за можностите и потенцијалите на оваа голема област во државата што, за жал, денес е најретко населена во Европа.

 

Остануваат надежите дека на средбите во Мариово ќе стигнат жители од Грција иако последните години претставници од Меглен не присуствувале на манифестацијата.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.