1-ва Скопска - МТМ Телевизија

Претседателката на Друштвото на писатели на Македонија (ДПМ) Соња Стојменска-Елзесер упати соопштение по повод актуелните политички превирања, за кое вели дека ги одразува ставовите на мнозинството членови на писателската асоцијација.

„Проблематизацијата на македонскиот јазик, идентитет и историја од страна на бугарската политика, искажана деновиве како уцена во процесот на нашата европска интеграција, за македонските писатели е особено загрижувачка. За неколку стотици активни писатели и неколку стотици починати писатели, врежани во македонскиот книжевен канон, евентуалната повреда на нивното основно изразно средство, јазикот, би претставувала директен удар врз суштинскиот градбен елемент на нивната уметност, и воопшто, удар врз нивниот творечки интегритет“, се наведува во соопштението.

Во него се нагласува дека јазикот на кој пишувале и пишуваат македонските творци е македонски и не може да биде никаков друг.

„Книжевниот систем на кој му припаѓаат, кој ги опфаќа сите варијации на оригинална и преводна литература, е македонски и никаков друг. Екстремните ставови на бугарските националисти, познати на македонската јавност од многу одамна, во овој миг како официјални државни ставови на Бугарија, како никогаш досега се закануваат да прераснат во жртвена клада на која, според нив, би требало да се изгорат илјадници и илјадници книги, кои не само со јазикот, туку и со тематиката, јасно го манифестираат својот македонски идентитет“, додава претседателката на ДПМ која запрашува дали навистина ќе дозволат европските, македонските и бугарските политичари да се случи антицивилизациски чин од невидени размери во 21. век.

Стојменска-Елзесер изразува увереност и дека бугарските колеги-писатели, или барем некои од нив, ќе имаат разбирање за ваквата загриженост и ќе дадат поддршка во одбивањето на, како што вели, погубните политики кои не водат кон ништо добро.