1-ва Скопска - МТМ Телевизија

Ученици од македонските и албанските паралелки од текстилно-кожарската струка од средното училиште „Перо Наков“ од Куманово вчера во Занаетчискиот дом организираа модна ревија на која ги презентираа нивните креации.

 

 

 Настанот е дел од проектот за меѓуетничка интеграција што го спроведува училиштето со поддршка на Министерството за образование и наука.

 

 

– Ние сме училиште со паралелки на македонски и албански јазик и овој проект има исклучително значење за поврзување на учениците, изјави директорката на училиштето Мила Жибак.

 

 

Професорките Маја Димковска и Бјондина Абдули, под чие менторство учениците ги изработија модните креации, велат дека последната година има благо зголемување на бројот на запишани ученици. Особено интерес има за насоката дизајн, а двете професорки велат дека оние кои веќе го завршиле образованието на оваа насока, веднаш нашле работа.

 

 

– Со минимални финансиски вложувања или од домашниот буџет, а почесто со користење на мерката за самовработување, учениците од оваа насока веднаш наоѓаат работа. Потребно им е многу малку време да одат на пракса, бидејќи самите се научени да креираат, да шијат и да изработат, посочуваат професорките Димковска и Абдули, додавајќи дека дел од учениците се вработуваат и во конфекциски фирми.

 

 

За потребите на проектот учениците изработија и цртежи инспирирани од старата градска архитектура кои вчера беа презентирани пред кумановци.