Куманово ќе продолжи со субвенционирање комуналии за ранливите категории граѓани

Општина Куманово и годинава ќе ги поддржи ранливите категории граѓани преку три програми, соопштија денеска одговорните од секторот за социјална, детска и здравствена заштита од општината. Овие програми се усогласуваат со потребите на граѓаните, но ќе бидат во согласност со измените што ги предвидува новиот закон за социјална заштита.

 

И годинава, стечајните работници ќе користат субвенции за комуналии, за сметка за изнесување смет и потрошена вода. Но, за разлика од претходните години кога бројката на корисници по овој основ изнесуваше околу 1.500 лица, годинава, во првите шест месеци ќе бидат опфатени 120 стечајци.

 

-На добар дел од претходните корисници решен им е статусот со законот за стечајците, така што тие веќе нема да ги користат овие субвенции, изјави овластениот раководител на секторот, Цоки Ристовски.

 

Општината ќе трансферира средства за потрошената вода и изнесување на комунален смет до двете јавни претпријатија во Куманово „Чистота и зеленило“ и „Водовод“, но вкупната сума не смее да надминува 1.200 денари.

 

Ваква субвенција ќе користат и еднородителските семејства од Куманово. За годинава, одвоени се средства за вкупно 100 семејства. Овие семејства во кои едниот родител е починат или татковството не е признаено беа опфатени со оваа субвенција, лани во август и тогаш бројката корисници по овој основ изнесуваше 78 семејства.

 

-Општината се обидува согласно своите финансиски можности да им помогне на ранливите категории граѓани, изјави Ристовски.

 

Годинава, општината ќе одвои 400 илјади денари за еднократна парична помош и помош во натура за најранливите категории кумановци. Овие средства се наменети за семејства чии домови настрадале од елементарни непогоди, пожари, поплави, семејства во кои има болни лица и за чие лекување се потребни средства.

 

Барање за исплата на еднократна парична помош можат да се поднесуваат два пати годишно, но едно семејство може да добие помош само еднаш во годината.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.