Можно е да се прошири истрагата за „27 април“

По опсежна предистражна постапка вчера е донесена наредба за истражна постапка против организаторите на настаните од 27-ми април. Се работи за пет осомничени лица Н.Г. , Т.В., М.Ј., С.Р. и Н.Б, кои се товарат дека сториле кривично дело „терористичко загрозување на уставниот поредок и безбедноста“.

 

На денешната заедничка прес-конференција државниот јавен обвинител Љубомир Јовески  и обвинителката Вилма Русковска од Основното јавно обвинителство за гонење организиран криминал и корупција, информираа дека организаторите и извршителите се товарат за исто кривично дело 313 од кривичниот законик, како оценка на Обвинителството.

 

Најавија дека може да има и проширување на истрагата доколку се обезбедат и други докази освен изјава на еден обвинет или на еден сведок.

 

Тие посочија дека во истрагата не се користени ПИМ мерки, но истрагата е тајна и не можат да се презентираат докази.

 

Обвинителката Русковска апелираше да се почитува  начелото на презумпција на невиност и одговарајќи на новинарското прашање дали после амнестијата за пратениците процесот нема да биде селективен, потенцира дека во Законот за амнестија, не е амнестирано кривично дело, туку се амнестирани поединечни дејствија. Од тие причини, подвлече, не смета  дека Законот за амнестија би бил каква било пречка, а во него е наведено дека не важи за организатори.

 

–  Осомничениот Н.Г, тогаш претседастел на политичка партија заедно со уште двајца осомничени ги повикал преку медиум граѓаните на протести и заедно со другите обвинети С.Р и М.Ј за таа цел ја ставиле во функција целата партиска структура на таа политичка партија и материјални средства. Цело време течела координација помеѓу нив и градските, месните и општинските комитети и изборните единици, при што се давале насоки и се повикувало членството на масовни протести, а исто така и критичниот ден за масовност и влегување внатре во Собранието, појасни Русковска.

 

Прашана како ќе се обезбеди присуството на Н. Г. таа напомена дека се работи веќе за истражна постапка и доказите ќе бидат испратени до судот, а тој поднесува барање за екстрадиција до Министерството за правда.

 

Обвинителката Русковска очекува грчките надлежни власти позитивно да одговорат на барање за екстрадиција на осомничениот Н.Б..

 

– Сметам дека надлежните органи во Грција ќе удоволат на барањето за негова екстрадиција од причина што, колку што ми е познато, екстрадицијата ја одбија затоа што за тоа дело веќе бил помилуван. За ова кривично дело не е помилуван и очекувам надлежните власти да одговорат позитивно на нашето барање за екстрадиција, рече обвинителката.

 

На прашањето дали ќе се случеше 27-ми април доколку не се отворија собраниските врати, Русковска рече дека доколку не беа отворени вратите немаше да се случи крвавиот настан.

 

Државниот јавен обвинител Јовески напомена дека станува збор за исклучително сложена постапка. За определено документирање на доказите, нагласи, им било потребно значително време, пред се во делот на вештачењето на одредени телефони и содржината на записите.

 

За вмешаност во настаните од 27 април вчера беше приведен поранешниот претседател на Собранието Трајко Вељаноски, како и поранешните министри за транспорт и врски и за труд и социјална политика Миле Јанакиески и Спиро Ристоски.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.