Почна уривањето дивоградби во Охрид

Со активности на објект на улицата „Марко Нестороски“ денеска Општина Охрид почна со најавуваното уривање на дивоизградените објекти низ градот и долж крајбрежјето.

 

Според соопштението од Општина Охрид, се постапува согласново законските процедури и Акцискиот план за постапување по препораките од последниот состанок на Комитетот за заштита на светското културно и природно наследство на УНЕСКО.

 

Со акцијата за уривање паралелно ќе бидат отстранувани дивоизградени објекти што се во тек на израдба и оние дивоградби опфатени со регистарот на дивоизгредени објекти, што се изградени во периодот од 2006 до 2019 година.

 

Според динамиката, прво ќе се отстрануваат објекти кај кои не постојат правни пречки и акцијата за уривање ќе ги опфати сите физички или правни лица кои имаат добиено Решение за отстранување на бесправно изграден објект/градба и истите не постапиле во согласност со издадените решенија од страна на градежните инспектори при Инспекторатот на Општина Охрид.

 

Објектот што денеска почна да се урива е во сопственост на физичко лице, изграден до фаза на карабина, а се градел без соодветно одобрение за градење.

 

Од Општина Охрид најавуваат дека целосно е посветена на успешноста на целокупната акција за отстранување на дивоградбите, со уште еден повик до сопствениците на дивоизградени објекти, да постапат согласно добиените решенија за отстранување на градбите. Во спротивно отстранувањето ќе го изврши општината, а трошоците за отстранување ќе ги сносат лицата кои се задолжени во решенијата.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.