1-ва Скопска - МТМ Телевизија

Јас лично ви ветувам дека битката со криминалот и корупцијата ќе биде следната голема битка. На патот по кој одиме одговорноста е суштина, порача во видеообраќање носителот во изборната единица 1 од коалицијата „Можеме“, Никола Димитров.

„Нема доволно правда. И ако ме прашате дали сум и jас разочаран, апсолутно сум. Но, да кренам раце, на краj памет не ми доаѓа. Во мојот ресор ја оставив душата. Таа огромна планина ја искачивме, постигнавме децениски цели, влеговме во НАТО и на чекор сме од почеток на пристапни преговори со ЕУ, во фаза сме кога се разговара за таа динамика и се усвојува преговарачката рамка“, посочи Димитров.

Тој воедно упати ветување дека со истата жар и енергија што ги вложил во евро-атлантскиот интегративен процес, во наредниот мандат ќе се вложи за да има правда во државата.

„Сакам да ве повикам, сите коишто се мислите дали да сте дома и дали да излезете на 15 jули и да гласате. Сакам да ве повикам да излезете. Имаме огромна шанса како нација, имаме Закон за Јавно обвинителство што овозможи истрагите и случаите да не застарат, да не се пикнат под килим и го имаме огромниот рефлектор што ни го носи пристапниот процес со Европската Унија. Мораме да ја искористиме оваа шанса, бидејќи следна нема да имаме“, посочи носителот во изборната единица 1 од коалицијата „Можеме“.