1-ва Скопска - МТМ Телевизија

 Според Стефан Васев од СДСМ, единствената задача на Христијан Мицкоски и врвот на ВМРО-ДПМНЕ е по секоја цена да се обидуваат да го бранат криминалот.

„Нема криминалец кој Мицкоски не се обидува да го одбрани од правдата и законите. Мицкоски и ВМРО-ДПМНЕ застанаа зад осудените насилници од крвавиот четврток кои упаднаа во Собранието и се обидоа да убијат пратеници. ВМРО-ДПМНЕ и Мицкоски застанаа зад криминалот на нивниот тајкун Орце Камчев. ВМРО-ДПМНЕ и Мицкоски не успеваат да го одбранат криминалот на нивниот ментор Сашо Мијалков. Целата јавност слушна снимка каде се докажува соработката на Мицкоски со Зоран Милески Кичеец, а денес оваа партија глуми загриженост за правдата и конструира непостоечки случаи“, истакна Васев.

Васев смета дека е голема нервозата кај Мицкоски и врвот на ВМРО-ДПМНЕ затоа што како што рече, никако не успеваат да го одбранат криминалот во своите редови, и не успеваат да ги реализираат нарачките од Будимпешта.

Затоа, додава Васев, секојдневно шират лажни вести и дезинформации, затоа поддржуваат протести на кои се бранат криминалци и насилници.

Според него, токму заради ваквото однесување граѓаните шест пати го казнуваат Мицкоски на избори и ќе продолжат да го казнуваат затоа што тој е на браникот на криминалот наместо на страната на граѓаните и државата.