Во Полошко зачестени напади врз полициски служебенци

Омаловажувања со навреди, па дури и физичките напади врз полицајци на должност, деновие во полошкиот регион станаа зачестена појава. За два дена приведени се две лица кои претходно навредувале и физички нападнале полициски служебници.

 

Последниот случај е регистриран рано утрово (31 јули) околу 1 часот и 20 минути на магистралниот пат Кичево-Гостивар, во близина на отворените сепарации. Во овој период, лишен од слобода е Х.С. (26) тој претходно, управувајќи патничко возило „опел зафира“ со гостиварски таблици, во 23 часот и 40 минути, бил запрен од патрола, а набрзо и нападнал полициски службеници. Х.С. задржан е во Полициската станица Гостивар за целосно расчистување и документирање на случајот, по што против него ќе следува соодветен поднесок.  Сличен настан имаше и вчера кога еден возач нападнал полицаец кој вршел регулирање на сообраќај. Од слобода беше лишен Х.И. (62) од гостиварското село Здуње и задржан во полициска станица.

 

Според евиденцијата на СВР Тетово на подрачјето кое го покрива од почетокот на годинава, заклучно со 30 јули, вкупно евидентирани се 10 физички напади на полициски службеници. Во евиденцијата регистрирани се и 14 случаи на навредување и омаловажување на полициски службеници и седум случаи на спречување службено лице во вршење службени дејствија.

 

Насилните реакции на граѓаните кон униформираните лица најчесто се при контролни активности.

 

– Најбројни во овој период се случаите поврзани со регулирање  сообраќајот, контролни активности во угостителски објекти, расчистување нарушувања на јавниот ред и мир и други безбедносни настани, вели Марјан Јосифоски портпарол на СВР Тетово.

 

Јосифоски посочува дека пријавените граѓани се соочуваат со парични казни, но и со затворски казни. За навреда и омаловажуавње на служебно лице според законот за прекршоци предвидена е глоба од 600 до 800 евра. За напад или попречување на службено лице во кривичниот закон е предвидена и затворска казна, додека за напад со оружје или телесна повреда казната може да достигне 10 години затвор.

 

Во случаи кога напаѓачот тоа ќе го побара, внатрешната контрола на МВР ја проверува пријавата и дополнително утврдува дали полициските службеници ги пречекориле овластувањата и предизвикале „бурна“ реакција кај граѓанинот кој е пријавен за напад, попречување или омаловажување.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.