(Видео) Пол Макартни го обвинува Џон Ленон за распадот на „Битлси“

Пол Макартни изјави дека сакал да продолжи да настапува со „Битлси“ кога легендарниот бенд се раздели во 1970 година и дека Џон Ленон го поттикнал распадот.

Шпекулациите за тоа што предизвика распад на најпознатата поп група во светот се движат од уметнички разлики и правни спорови, па до бракот на Ленон со Јоко Оно.

Во претстојната епизода на „Би-би-си радио 4“, This Cultural Life, Макартни (79) дискутира за, како што рече, најтешкиот период во својот живот.

„Јас не ја поттикнав разделбата. Тоа беше нашиот Џони. Ова беше мојот бенд, ова беше мојата работа, ова беше мојот живот, затоа сакав да продолжи.“

Запрашан за неговата одлука да продолжи самостојно, Макартни даде свое објаснување за тоа што се случило. „Џон влезе во соба еден ден и рече дека ги напушта ‘Битлси’. И тоа беше како развод . Останавме да ги собереме парчињата."

Макартни нагласи дека бендот ќе продолжел ако Ленон не си заминеше. „Мислев дека правиме прилично добри работи – Аbbey Road, Let It Be, не е лошо.“

Тој тврди дека откако Ленон соопштил дека сака да си замине, останатите членови на бендот биле советувани од нивниот нов менаџер, Ален Клајн, да ја чуваат тајната за нивниот претстоен распад уште некое време.

„Така, неколку месеци моравме да се преправаме. Беше чудно бидејќи сите знаевме дека е крајот на Битлси, но не можевме само да си заминеме“.

Целото интервју на „Би-би-си“ со Макартни ќе биде објавено на 23 октомври.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.