1-ва Скопска - МТМ Телевизија

Белоруската спринтерка Кристина Тимановскаја го повика Меѓународниот олимписки комитет (МОК) да се вклучи во нејзиниот случај. Таа изјави дека била отстранета од националниот тим и била однесена на аеродромот во Токио против нејзина желба, поради критиките што ги упатила кон националните селектори.

„Барам помош од Меѓународниот олимписки комитет“, вели Тимановскаја во видеото објавено на Телеграм каналот на Белоруската фондација за солидарност во спортот.

„Има притисок врз мене. Тие се обидуваат да ме извлечат од земјата без моја дозвола. Барам од МОК да се вклучи“, вели таа.

„Ме исфрлија од тимот затоа што зборував на Инстаграм за негрижата на нашите тренери“, е нејзиното објаснување. „Некои од девојките не дојдоа да се натпреваруваат бидејќи немаа направено доволно допинг тестови“, рече таа.

„Тренерот ми рече дека дошла наредба 'од горе' да ме отстранат од тимот“, додаде Тимановскаја, објаснувајќи дека побарала од членовите на белоруската дијаспора во Јапонија да ѝ помогнат на аеродромот.

„Дејли мејл“ објави дека таа останала со јапонската полиција на аеродромот во Токио и дека неофицијално побарала азил во Германија или Австрија, бидејќи се плаши да се врати во земјата.