1-ва Скопска - МТМ Телевизија

Во напад на руско беспилотно летало врз градот Измаил на југот на Украина во близина на границата со Романија загинаа три лица, а 14 беа повредени, меѓу кои и три деца, објави регионалното Обвинителство на Одеса.

„Терористички напад од големи размери во раните утрински часови предизвика неколку пожари, покрај штетата на куќите“, изјави регионалниот гувернер на Одеса, Олех Кипер, на апликацијата за пораки „Телеграм“.

Во текот на ноќта рускиот ракетен напад врз централниот град Днепро оштети и индустриски капацитет и предизвика пожар, изјави на „Телеграм“ регионалниот гувернер на Днепропетровск, Сергеј Лисак.

Нападите со беспилотни летала и гранатирање на регионот ја оштетија инфраструктурата, рече Лисак, додавајќи дека нема пријавени жртви во нападите.

Воздухопловните сили на Украина соопштија дека собориле 24 од 32 беспилотни летала за време на рускиот напад во текот на ноќта. Според соопштението, еден од дроновите влегол во романскиот воздушен простор.

Руските сили употребиле и една балистичка и две крстосувачки ракети за време на нападот, додаваат од воздухопловните сили.