1-ва Скопска - МТМ Телевизија

Рудолф Џулијани, кој е адвокат на американскиот претседател Доналд Трамп, ја отфрли можноста домаќинот на Белата куќа лично да се сретне со специјалниот обвинител Роберт Милер за да сведочи за случајот на таканаречената руска интервенција во претседателските избори, пренесоа светските медиуми.

Претходно адвокатот на американскиот претседател соопшти дека правниот тим на Трамп му испратил на Милер писмени одговори на заинтересираните прашања за случајот за интервенција во изборите. Во петокот телевизија Си-Ен-Ен изјави дека адвокатите на претседателот ги обновиле консултациите во врска со можната средба на Трамп со истражителите.

Во интервјуто за телевизијата Фокс њус, Џулијани ја негираше оваа можност. "Само преку моето тело", беше дециден, одговарајќи на прашање. Џулијани додаде дека Трамп нема лично да разговара со истражителите поради стравувањата дека тие можат намерно да го помешаат со своите прашања, а потоа да се обидат да го фатат со давање лажни индикации.

"Јас се згрозив од тактиката што ја носат", изјави Џулијан на иследниците. "Особено по она што тие го направија со Мајкл Флин", истакна адвокатот, мислејќи на советникот на претседателот за национална безбедност, кој во февруари минатата година беше принуден да поднесе оставка поради тоа што не информирал за содржината на неговиот разговор со рускиот амбасадор во САД.

Роберт Милер од минатата година води истрага во врска со тврдењата за руска интервенција во претседателските избори во 2016 година. Трамп и неговите советници постојано ги отфрлуваат сомневањата за контакти со официјалните руски лица за време на предизборниот период. Москва, исто така, ги отфрла обвинувањата дека влијаела на текот на изборите во САД.