1-ва Скопска - МТМ Телевизија

Поранешниот тениски ас Џон Мекинро смета дека Енди Мареј може да го повтори успехот на Роџер Федерер, Рафаел Надал и Новак Џоковиќ и повторно да се најде на врвот на светскиот тенис.

По речиси една година надвор од терените поради повреда на бутот и операцијата што следуваше, Мареј се врати на терените во јуни годинава, но по делумните успешни настапи предвреме ја заврши сезоната, за да може да се подготви и да се врати максимално подготвен за 2019-та.

- Тој е еден од најдобрите играчи во последните 10 години. Ако е повторно на 100% или барем блиску до тоа, очекувам да се врати во првите 10 во наредните 6 до 9 месеци.

- Гледајте што направија Федерер на 36, Надал… Џоковиќ одеднаш се претвори во стариот Џоковиќ оваа сезона, па сигурен сум дека Мареј го гледа тоа и си мисли: „Способен сум да направам нешто слично", изјави легендата на светскиот тенис.

Во отсуство на Мареј, прв рекет на Велика Британија стана 23-годишниот Kајл Едмунд. Тој дојде до полуфиналето на Австралија Опен и го освои својот прв АТП трофеј, завршувајќи на 14-тото место на листата.

- Топ 10 е реална цел за него, но тој ќе чувствува многу тензија во почетокот на сезоната. Ако не се справи со неа, тој ќе испадне од топ 20.

- Тој мора да биде емотивно стабилен, знаејќи дека сезоната допрва претстои, додаде Мекинро.