1-ва Скопска - МТМ Телевизија

Првиот академски час на Економскиот факултет, на Универзитетот „Св. Кирил и Методиј“  симболично го отвори ректорот на УКИМ Никола Јанкуловски.

Бруцошите, со пригодна свеченост ги пречекаа и деканот, како и продеканите на факултетот, кои им посочија дека единствено со одговорност и посветеност се постигнува успех, а потоа им ги врачија и препознатливите црвени индекси.

 Новите студенти, возбудени, со нетрпение чекаа да ги заземат своите места во предавалните и амфитеатрите. Очекуваат успех во студирањето, како и во понатамошната кариера.

 На државните универзитети годинава се отворија места за вкупно 21.778 бруцоши. На Универзитетот „Св. Кирил и Методиј“ примаа 11.661 студент, на „Гоце Делчев“ во Штип годинава имаше место за 5.037 бруцоши, на битолскиот ,,Св. Климент Охридски“ - 3.635 студенти, на Државниот универзитет во Тетово имаше место за 3.185 бруцоши, а на „Мајка Тереза“ во Скопје – за 1.445 студенти.

Квотите не беа пополнети секаде. Според податоците на Државниот завод за статистика, во академската 2017/2018 година биле запишани вкупно 56.941 студент, што било за 2 отсто помалку во споредба со претходната година.

Најголем процент – 85,7 отсто биле запишани на државните високообразовни установи, а 13,9 отсто студирале приватно. Академската година 10 години почнуваше на 15 септември, но во согласност со новиот Закон за високото образование академската година започнува на 1 октомври, како што беше во минатото.