1-ва Скопска - МТМ Телевизија

,,Вистинска грижа за жените, еден поинаков 8-ми март,, е насловен целодневниот настан во Општина Бутел по повод денот на жената. Предавања за здравјето на жената, како и бесплатни лекарски прегледи за над 200 жени од општината и од администрацијата беа направени денеска во просториите на општината.

За жените кои живеат на територија на Општина Бутел, како и за жените од администрацијата денеска беше организиран целодневен настан, поразличен од останатите, насловен ,,Вистинска грижа за жените, еден поинаков 8-ми март,,. Имено, во просториите на општината денеска од страна на доктори специјалисти беа извршени прегледи на над 200 жени од општината и од администрацијата во Општина Бутел. Бесплатните прегледи за жените вклучуваа тумор маркери, физичко прегледување на градите, проверка на шеќер и маснотии во крвта. Докторите истакнуваат дека ваков вид прегледи се од голема важност за жените и за рано откривање на некоја болест, и апелираат и другите да спроведуваат ваков вид акции затоа што подобро е да се превенира отколку да се лекува.

Освен прегледите денеска се одржа и предавање за самопреглед на жените, за неопходноста од редовното правење на ЕХО прегледите, мамографските прегледи на дојка, ПАП тестовите и другите прегледи за женското здравје. Градоначалникот на Општина Бутел Велимир Смилевски истакна дека оваа година решиле 8-ми март да биде одбележан на едн поинаков начин со цел да се зголеми свеста за континуирана заштита на здравјето на жената и здравјето на семејството и најави дека вакви акции ќе се организраат почесто во општината.

Од невладината организација АЛ-МА кои се партнери на општината во организацијата на оваа акција велат дека се надминати нивните очекувања за жените заинтересирани за прегледите.