1-ва Скопска - МТМ Телевизија

Денеска отпочнуваме со асфалтирање на улицата Товарник во населба Ченто, која е финална постапка, откако претходно поставивме целосна водоводна, атмосферска и канализациона мрежа, изјави градоначалникот на општина Гази Баба, Борис Георгиевски. По овој принцип, ќе бидат урбанизирани сите улици во Гази Баба.

Тесната и тешко пристапна улица, каде едвај се разминуваа две возила и која во голем дел беше узрурпирана, веќе има нов лик. Добивме улица широка 5 метри, во две ленти, со тротоари од двете страни за поголема безбедност на пешаците, а која е долга 515 метри.  

Немаше да успееме да ги санираме проблемите на оваа улица, да не ни помогнаа и граѓаните, кои дадоа се од себе за брзо и ефикасно, заеднички да ја модернизираме нивната улица. И затоа им се заблагодарувам што го препознаа нашиот искрен пристап и што имаа трпение додека траеше целиот процес.

Со ова, сакам да најавам дека почнуваме со воведување на ред во безредието кое постои на многу улици во оваа општина и дека сите улици отсега ќе бидат градени по план од кој што ќе нема отстапки.

Во меѓувреме, работиме на улици и во околните населени места како што се Инџиково, Синѓелиќ, Стајковци, Маџари. Вкупно 28 улици до крајот на летото, ќе добијат модерен и урбан изглед. За овој проект општина Гази Баба од својот буџет одвои 80 милиони денари, 20 милиони денари се од Агенцијата за магистрални и регионални патишта, а 5.500.000 денари се обезбедени од градот Скопје.

Според планот на општината за оваа година, до крајот на летото ќе се обидеме да реализираме комплетно асфалтирање на 20 км асфалтна површина.