Издадено прво одобрение за градба во новиот мандат на градоначалникот на Општина Петровец
- Детали
- Категорија: Петровец
- Создадено: 31 Октомври 2017
Градоначалникот на Општина Петровец Борче Митевски денеска го издаде првото одобрение за градба во новиот мандат. Белгиската компанија М Стеел е компанијата која го доби одобрението и на почетокот од 2018 ќе започне да го гради својот деловен објект на површина од 2.900 м2 во Мултифункционалната зона Ќојлија.
Белгиската компанија М-Стеел е новиот инвеститор во Општина Петровец кој денеска доби одобрение за градба во Мултифункционалната зона Ќојлија. Ова е прво решение издадено во новиот мандат на градоначалникот Борче Митевски, а како што најави тој до крајот на годинава ќе бидат издадени уште 4 одобренија за градење, со што продолжува градежната офанзива во оваа зона која има одлична местоположба поради близината на аеродромот Александар Велики и автопатот.
Градоначалникот на Општина Петровец Борче Митевски истакна дека со несмалено темпо продолжува да работи и во наредните 4 години се со цел да се исполнат ветувањата кои ги дале на инвеститорите и на граѓаните, пред се да се намали невработеноста во општината. Како што најави Митевски со изградбата на новиот објект на М Стеел се очекува да се вработат 70-80 луѓе, а со оглед на тоа што во моментов во зоната Ќојлија се градат 30 индустриски објекти, градоначалникот очекува во 2018 година да има недостаток на работна сила во општината.
Белгиската компанија М Стеел која се занимава со обработка на лим, негово превиткување, заварување и сл. во Општина Петровец ќе гради деловен објект на површина од 2.900 м2, а изградбата ќе започне на почетокот од 2018 година.
Маргарита Младеноска, генерален менаџер на М Стеел истакна дека одлуката својата инвестиција да ја прошират токму во Општина Петровец е поради најповолните услови кои ги добиле од оваа општина.
Во Мултифункционалната зона Ќојлија продадени се 77 парцели на домашни и странски инвеститори за разни намени, од хотели до лесна индустрија, прехранбена, логистика и производство на автомобилски делови.
Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk
Можеби ќе ве интересира:
Сите статии објавени на МТМ.мк се во согласност со ИАБ етичкиот кодекс