Германија со своите искуства е подготвена да помогне во унапредувањето на администрацијата во Македонија
- Детали
- Категорија: Македонија
- Создадено: 12 Ноември 2024
Министерот за јавна администрација, Горан Минчев, денеска се сретна со амбасадорката на Германија, Петра Дрекслер.
Фокусот на средбата беше можноста за унапредување и продлабочување на билатералната соработка помеѓу двете земји, со акцент на реформите во јавната администрација и подобрувањето на ефикасноста на јавните услуги.
Министерот Минчев ја нагласи посветеноста на Министерството за јавна администрација за имплементација на модерни и дигитализирани услуги, кои ќе им овозможат на граѓаните побрз и поефикасен пристап до администрацијата. Во овој контекст, тој ја истакна важноста на поддршката од страна на Германија, како и можноста за споделување добри практики и искуства, кои ќе придонесат за унапредување на капацитетите на јавниот сектор во државата.
Амбасадорката Дрекслер изрази подготвеност за продолжување на соработката и поддршка на процесот на реформи, како и за заедничка работа на проекти, кои ќе придонесат за приближување на Република Македонија кон европските стандарди.
Таа ја потенцира важноста на транспарентноста, отчетноста и ефикасноста на институциите во создавањето поефикасен јавен сектор, кој ги задоволува потребите на сите граѓани.
Средбата заврши со заедничко уверување за понатамошно јакнење на соработката во областа на јавната администрација и споделување на германските искуства во насока на исполнување на европските стандарди и поддршка на процесите за модернизација и реформи на јавниот сектор во Република Македонија.
Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk
Можеби ќе ве интересира:
Сите статии објавени на МТМ.мк се во согласност со ИАБ етичкиот кодекс
