1-ва Скопска - МТМ Телевизија

Јанко Бачев лидер на партијата Единствена Македонија и предводник на кампањата „Македонија бојкотира“ на вечерашниот собир од гостиварци побара масовно да кажат не, на, како што рече, капитунантскиот договор со кој се брише се македонско. 

Тој ги обвини актуелните министри во Владата дека шират лаги.

- Не им верувајте на лагите што ги зборуваат Димитров, Шеќеринска и Заев.Тие се одродени Македонци. НАТО ги интересира само послушни политичари кои ќе им служат верно, а тие пак мислат дека НАТО ќе им го заштити украденото, рече Бачев.

Зборуваше и за последната одлука со која Уставен суд ќе заседава на 19 септември.

- Власта е во очај и еве тоа се покажува бидејќи Уставниот суд на 19 септември ќе расправа за референдумот. Власта со притисок до Уставниот суд ќе бара да се укине одлуката за референдумот и на тој начин да го избегнат големиот срам кој се обидоа да го наметнат. За овој потег доказ е и последната анкета која покажува дека 80 отсто од граѓаните го бојкотираат референдумот, рече Бачев.

Тој на гостиварци им порача, сите заедно, без оглед на политичката определба, да се обединат за референдумот да не успее. 

- Влогот е голем. Ова е света борба на сите нас, бидејќи немаме што да изгубиме. Ова е момент кога сите треба да се обединиме како Македонци. Ова е борба на целиот македонски народ, борба за опстанок на Македонија и Македонците и затоа мора да ја добиеме оваа битка, рече Бачев.