1-ва Скопска - МТМ Телевизија

Во изминатите петнаесет дена од оваа година дебарската Територијална противпожарна единица имала две, додека лани 109 интервенции.

Споредено со претходната година, дебарските пожарникари, кои интервенираат во општините Дебар, Центар Жупа и Маврово-Ростуше, односно подрачјето на Река, имале помалку работа.

Според командирот на единицата Џетан Мифтароски, бројот на интервенци е речиси 50 отсто помал споредено со 2017 година, колку што е помала и предизвиканата материјална штета.

-Лани имавме 109 интервенции. Од нив 90 се пожари, при што 27 се на објекти додека 63 на отворен простор, главно стрништа. Две се интервенции на сообраќајни возила и 17 други технички интервенции. Вкупната предизвикана материјална штета е 4.581.750 денари. И бројот на пожарите и материјалната штета се помали за 50 осто споредено со 2017 годна, изјави Мифтароски за МИА.

Посочува дека причинетата материјална штета е помала благодарение на брзата интервенција, што е резултат на добрата опременост, кадровската екипираност и обученост на единицата.

Според Мифтароски, бројот на пожарите е помал поради зголеменото ниво на совесност кај граѓаните, што е резултат на редовните апели и превентивно-едукатвните средби со нив.

Бидејќи се наоѓаме во период на грејна сезона, Мифтароски упатува апел до граѓаните редовно да ги чистат оџаците, бидејќи лани причината за поголемиот број од пожарите во објекти биле токму неисчистените оџаци.