1-ва Скопска - МТМ Телевизија

По трагедијата во Нови Сад во која животот го загубија 14 лица, нивните семејства продолжуваат да ја споделуваат тагата со своите следбеници на социјалните мрежи.

Една од нив е мајката на 20-годишната Ангела Руман, која загина во несреќата заедно со нејзиното момче Милош.

Зорица Руман на Фејсбук напиша: „Не осудувајте ја ожалостена мајка. Таа има многу форми. Дише, но и умира. Можеби изгледа млада, но внатре е стара. Се смее, но нејзиното срце плаче. Зборува, готви, чисти, работи – таа е присутна, но не е тука. Дел од неа засекогаш е на друго место“.

Поради трагедијата на железничката станица во Нови Сад, се одржаа низа протести на кои граѓаните побараа политичка одговорност и кривично гонење за лицата кои го проектирале, граделе, надгледувале и го одобрувале проектот за реконструкција на таа зграда.

Според медиумите, поради притисок од јавноста, Вишото јавно обвинителство во Нови Сад на 21 ноември соопшти дека 12 лица се уапсени поради сомнение дека се одговорни за падот на настрешницата од зградата на железничката станица, додека по едно лице се трага.

Меѓу нив беше и Горан Весиќ, до неодамна министер за градежништво, но тој во меѓувреме беше ослободен од притвор.