1-ва Скопска - МТМ Телевизија

16-годишно момче денеска е уапсено во градот Храдец Кралова во Чешка под сомнение дека во трговски центар избол две жени продавачки и им нанел смртоносни повреди.

Нападот се случил нешто по 8.30 часот во продавница во трговскиот центар. Едната од продавачките била избодена со нож во делот за клиентите, а другата била нападната во делот за персоналот. Полицијата на местото на настанот го пронашла ножот со кој е извршено делото. Според портпаролката, сечилото за кое станува збор е долго 20-ина сантиметри.

Мотивот за нападот сѐ уште не е познат. Како што потврдија од полицијата, малолетник на 16 години е уапсен на речиси километар од местото на нападот под сомнение дека извршил убиство. Тој е чешки државјанин.

„Тој беше уапсен десетина минути по добивањето на повикот“, соопшти полицијата.

Идентитетот на жртвите не е соопштен, а не се познати ниту возраста на починатите жени. Полицијата соопшти дека истрагата е во тек.

Лекарите од итната медицинска помош констатирале дека обидот за реанимација траел 40-ина минути, но ништо не можело да се направи за жените.