1-ва Скопска - МТМ Телевизија

Шпанското судство ја суспендира одлуката за повторно воведување карантин за населението во Леида и околината.

Воведувањето карантин беше наложено од страна на локалните власти на провинцијата Каталонија, поради ширењето на коронавирусот.

„Судот на Леида одлучи да не ги потврди мерките преземени од локалните власти затоа што тие се против законот“, изјави Високиот суд на Каталонија. Оваа одлука за суспендирање на карантинот може да биде обжалена.

Локалните власти наредија 200.000 жители да бидат ставени во карантин поради повторното ширење на коронавирусот во тој дел од земјата.

По нагло опаѓање на бројот на заразени и мртви во Шпанија, која беше една од најпогодените земји во Европа, со повеќе од 28.400 смртни случаи, повторно се појавија жаришта на коронавирусот.

Зоната Леида особено ги загрижува локалните власти, а повторното појавување на епидемијата во областа веројатно се должи на пристигнувањето на сезонски земјоделски работници.