1-ва Скопска - МТМ Телевизија

Демонстрантите незадоволни од резултатите на претседателските избори во Белорусија синоќа повторно се собраа на улиците. За време на протестите кои не беа претходно најавени, се приведени 114 лица.

Олга Чемоданова, портпарол на Министерството за внатрешни работи, рече дека во саботата, 1.700 лица присуствувале на протестите на 12 различни локации низ целата земја. Таа посочи дека за време на демонстрациите биле приведени 114 лица, од кои 99 биле во главниот град Минск и дека 87 лица ќе бидат притворени додека не бидат изведени пред суд.

Таа додаде дека приврзаниците на претседателот Александар Лукашенко, исто така, одржале митинзи низ целата земја, на кои присуствувале повеќе од 50.000 луѓе.

Во Минск се одржаа протести против Лукашенко, на кои учествуваа само жени. Во еден момент, групата жени ги влечеле полицајците за униформите, им ги искинале маските и ги спречиле полициски возила да поминат.

Протестите во Белорусија започнаа откако беше објавено дека Александар Лукашенко победи на претседателските избори на 9 август. Многумина изразија незадоволство од резултатот, обвинувајќи ги властите за лажирање на изборите. Демонстрантите бараат нови избори и уставни измени.