Реконструкција на спортската сала во ООУ „Мирче Ацев“ во општина Ѓорче Петров
- Детали
- Категорија: Ѓорче Петров
- Создадено: 03 Октомври 2023
Со менување на подот во училишната спортска сала, кој ќе биде заменет со нов гумиран под, бојадисување на салата, но и молерисување на ходникот и кабинетот на наставникот по физичко образование, денеска почна реализација на проектот „Санација и опремување на спортската сала во ООУ ‘Мирче Ацев’“, извести Општина Ѓорче Петров.
Општината во соработка со Министерството за образование и наука денеска ги почна градежните работи за репарација на училишната сала, каде што неопходно беше да се санираат дотраените елементи.
Ова е прв чекор од проектот. Во втората фаза училишната сала ќе биде опремена со нови спортски реквизити.
Увид во градежните работи денеска изврши градоначалникот Александар Стојкоски, кој истакна дека ова е уште еден чекор кон подобрување на условите во училниците и салите.
„Децата мора да имаат соодветни материјали за работа, но и за спортување. Само така создаваме здрави и спортски генерации и само така им ја всадуваме љубовта кон физичкото образование уште од најрана возраст“, рече Стојкоски.
Проектот на МОН опфаќа рехабилитација на 10 објекти за физичко образование за основни и средни училишта.
Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk
Можеби ќе ве интересира:
Сите статии објавени на МТМ.мк се во согласност со ИАБ етичкиот кодекс