1-ва Скопска - МТМ Телевизија

Општина Ѓорче Петров и Република Македонија оваа година го прават првиот чекор кон приклучување кон глобалната иницијатива „Да ги направиме градовите отпорни 2030“ (MCR2030), информираат од таму. Овој потег, според нив претставува значаен чекор кон развој на локалниот капацитет за управување со ризици и подобрување на отпорноста на заедниците пред природни катастрофи, со цел осигурување на безбедноста и благосостојбата на сите граѓани.

Локалната самоуправа на Ѓорче Петров, во соработка со UNDRR и Центарот за Управување со Кризи, има уникатна можност да работи на зајакнување на инфраструктурата и подобрување на свеста за ризиците кои ги носат природните катастрофи. Преку техничка поддршка и пополнување на картата за резултати за отпорност на катастрофи, Ѓорче Петров прави, како што велат, чекори кон создавање на подобро координирана и поодржлива заедница.

„Процесот на проценка на отпорноста е само почеток,“ истакна градоначалникот Стојкоски, нагласувајќи дека целта е градење политики и стратегии кои не само што ќе бидат локално адаптирани, туку и усогласени со глобалната Рамка за намалување на ризикот од катастрофи. Со своите партнери, општина Ѓорче Петров останува посветена на вложувањето во капацитетите на своите заедници, правејќи ги поотпорни и способни да се адаптираат и опоравуваат по секоја катастрофа, нагласуваат од општината.