Одбележан Денот без автомобили во Скопје
- Детали
- Категорија: Град Скопје
- Создадено: 21 Септември 2018
Во рамките на „Европската недела на мобилност“ во Скопје денеска се одржа велосипедско дефиле под мотото „Комбинирај и движи се“, на кое се придужија заменик-министерот за животна средина и просторно планирање Јани Макрадули и евроамбасадорот Самуел Жбогар.
Велосипедистите тргнаа од Порта „Македонија“ и возеа до Школка во Градскиот парк, каде следеше забавна програма, а повеќе среќни добитници преку лотарија добија велосипеди, тротинети и велосипедски реквизити, како симбол на користење на алтернативни превозни средства.
Макрадули им порача на учесниците да возат внимателно и го поздрави нивното присуство на настанот.
- Убаво е да се види дека ве има во толку голем број, многу поголем за разлика од претходната година. Го запревме сообраќајот за еден час и тоа е доволно добро, истакна Жбогар.
Љубица Јанчева, претседателката на Советот на Град Скопје наведе дека повеќе од 2.600 градови учествуваат оваа година на Европската недела на мобилност.
- Целта на Европската недела на мобилност е отстранување на проблемите што моторните возила ги предизвикуваат во градовите и повторното враќање на просторот на луѓето - пешаците и велосипедистите, како и на јавниот превоз, нагласи Јанчева.
Таа посочи дека активностите на Град Скопје при организирање на Европската недела на мобилност се забележани во рамките на Европската унија.
- Поради што Градот Скопје веќе неколоку пати се вбројува меѓу првите 10 градови по обемот и квалитетот на активностите, понатаму се потенцираат одредени проекти, кои се даваат како пример за добра пракса, наведе Јанчева.
Таа истакна дека во 2016 година, Град Скопје бил најуспешен и влеегол во најдобрите три града во борбата за првото место.
Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk
Можеби ќе ве интересира:
Сите статии објавени на МТМ.мк се во согласност со ИАБ етичкиот кодекс