1-ва Скопска - МТМ Телевизија

„Веста дека од страна на битолското Обвинителство е отворен предмет поради фотографијата на заменик-директорот на ‘Македонијапат’, Сашо Дранго, фотографиран со застрелана мечка, животно со највисок степен на заштита во Македонија, е добар чекор кон разрешница доколку сакаме да се наречеме правна држава“, велат од „Анима мунди“.

„Преку дадените изјави Сашо Дранго ја инволвира и институцијата во која е функционер, како и луѓето што работат таму, а кои нема да дозволиме да послужат како параван.

Имајќи предвид дека во билтенот на МВР не постои податок на сообраќајна несреќа со мечка за декември, како и дека во случај на таква постапка има строго дефинирана процедура во согласност со Законот за дивечот и ловството и Законот за заштитата и благосостојбата на животните, не смее да се постапува без МВР; како и дека мечката не е на пат, туку во шума и дека толку големо животно нема начин да се поместува за фотографирање, освен доколку е штотуку убиено, невкочането (сѐ уште топло), очекуваме брзо согледување на реалната состојба, брзо постапување и најстрога казна.

Бараме да се провери дали во декември постои пријава за убиство на мечка во некоја од надлежните институции или во ОЈО. Доколку има пријава, дали службеници од МВР и пратеници се труделе да го скријат случајот?

Воедно, бараме од министерот за внатрешни работи да провери и да ја информира јавноста дали Дранго, кој на фотографиите го гледаме во ловечка униформа, вооружен со снајпер и двоглед, има забрана за користење оружје и дали му е одземено во претходна постапка, т.е. дали овој снајпер што го гледаме сите е држен спротивно на законот?“, прашуваат од „Анима мунди“.