1-ва Скопска - МТМ Телевизија

Претседателот на Сојузот на синдикати на Македонија (ССМ) Слободан Трендафилов е подготвен една година тој и сите избрани и именувани лица за земаат плата од 500 евра доколку веднаш во Собранието се изгласа измена со која и минималната плата ќе се зголеми  на 500 евра. Предлогот Трендафилов го даде како одговор на нападите дека синдикалните лидери од ССМ земаат високи плати на грбот на работниците.

„Јас како претседател на ССМ подавам рака на сите избрани и именувани лица во Македонија, 1080 мислам дека беа на број, од утре мене и нив платата да ни биде 500 евра, но заедно да изгласаат закон за измени и дополнувања на Законот за минимална плата и работниците да добијат 500 евра минимална плата. Јас и тие една година ќе примаме минимална плата од 500 евра и јас немам никаков проблем со тоа. Ги повикувам следниот пат текстот кој ќе го внесат во идиотот и кога ќе читаат од идиотот да прочитаат дека тие се согласни цела Влада, цел парламент, сите избрани и именувани лица, директори, шефови, раководители и што ли уште не кои се ухлебани на државна сметка цел живот, да примаме 500 евра минимална плата колку што ќе примаат близу 200.000 работници во Македонија“, рече Трендафилов.

Посебно се обрати до пратеникот Бране Петрушевски од ВМРО-ДПМНЕ кој на прес – конференции зборува за платата на синдикалните претставници и побара исправка.

„Го повикувам од неговата плата да ми даде дел за да ми ги надополни овие 15.000 денари кои ги немам и секој месец да имам 75.000 денари за да не лаже“, рече Трендафилов кој објасни дека неговата плата е 60.000 денари обезбедени од членарината на работниците во синдикатите и нагласи дека на ист начин ќе се борел за минимална плата од 500 евра и кога неговата би изнесувала 300.000 денари.

ССМ извести дека протестот закажан за утре, кој ќе претставува јавна седница на највисоките синдикални тела, ќе почне во дванаесет часот и пет минути. На улица ќе излезат 300 членови на највиското раководство на ССМ, а добредојдени се и работниците.

„Јавната седница ќе биде отворена пред ССМ и ќе продолжи пред парламентот каде што ќе им порачаме на пратениците дека не може да има за пратениците, а да нема за работниците. Ќе продолжиме пред Стопанската комора каде што ќе порачаме дека подадената рака од работникот денес, може многу лесно да стане стисната тупаница утре. Ќе завршиме пред Владата каде што ќе им порачаме на владините функционери дека не може да се одлучува за работниците беа работниците“, најави претседателот на ССМ, Трендафилов.

Преку утрешната јавна седница, ССМ сака да го изрази незадоволството од политиките кои ги води Владата за кои сметаат дека се во погрешна насока и на штета на работниците. Барањата се 500 евра минимална плата и зголемување за 100 евра на сите останати плати.