1-ва Скопска - МТМ Телевизија

Крадат струја коалиционите партнери на Заев од ГТЦ, а од МВР велат дека тоа не било кривично дело за кое што требало да сносат одговорност, обвини денеска портпаролот на ВМРО-ДПМНЕ, Димче Арсовски.

„Јавна тајна беше дека на трошок на дуќанџиите од ГТЦ се копа криптовалути, а МВР вели дека ЕВН утврдиле дека нема крадење, туку дека имало дополнителни броила и таму била приклучена таа машина за копање. Од ЕВН пак велат дека нема дополнителни броила и дека има само едно броило за ГТЦ, со што потврдија дека МВР лаже и го штити криминалот“, посочи Арсовски.

Според партискиот портпарол, станува збор за класичен грабеж од дуќанџиите, односно како што кажа, класичен криминал што го прават директорот на ГТЦ, Ѓоко Трајчевски и претседателката на одборот на директори, Трајанка Тасевска, инаку сопруга на директорот на БЈБ.

„Дали со плаќање на повисока цена, односно препродавање на повисока цена на струја кон дуќанџиите од страна на ГТЦ, се покривало крадењето струја кое што го правело семејството Бајрам?“, јавно запраша Арсовски, барајќи одговори од МВР, Трајчевски и Тасевска.