1-ва Скопска - МТМ Телевизија

ОД 2006 година, фондацијата „Бертелсман“ проценува околу 140 земји на секои две години врз основа на тоа дали тие се развиваат кон демократија или автократија. Сегашната студија покажува дека автократиите сега се мнозинство, пишува ДВ во анализата.

Според една нова студија, квалитетот на демократијата се влошил во изминатите 20 години во 137 земји кои можат да се опишат како земји во развој или т.н. земјите во подем. Според „Индексот на трансформација на фондацијата Бертелсман“, сега имаме 63 демократии наспроти 74 автократии, односно земји во кои нема слободни избори или функционално владеење на правото.

Само во последните две години, обележани со новата геополитичка ситуација, руската агресивна војна против Украина и пандемијата на коронавирус, изборите во 25 земји беа помалку слободни и фер од порано. Слободата на изразување и слободата на печатот се повеќе се ограничуваат во 39 земји.

Фондацијата го покани и германскиот канцелар Олаф Шолц на презентацијата на Индексот на трансформација. Со зголемувањето на десничарскиот популизам и во Германија, Шолц рече дека е задоволен што стотици илјади луѓе неодамна излегоа на улиците поради тоа. „Тоа не дојде одозгора или од партиите. Мора да размислуваме за одбрана на демократијата, а тоа не е игра, не се прави на Интернет, тоа сме ние. Ние самите мора да ја заштитиме демократијата“, рече тој.

Сабине Донер е една од авторите на студијата. Таа за ДВ зборува за ефектот што пандемијата на коронавирус, со полицискиот час и привременото намалување на граѓанските слободи, го имаше врз демократскиот развој: „Пандемијата беше можност уште повеќе да се ограничат правата и да се концентрира уште поголема моќ на владите. Но, во основа, пандемијата не создаде проблеми што веќе не постоеја“.

Според Фондацијата Бертелсман, студијата е најголемото и најсеопфатно истражување од ваков вид. Студијата се заснова на 5.000 страници извештаи за земји, составени од фондацијата со помош на 300 експерти, универзитети и тинк-тенкови во околу 120 земји. Ја испитува состојбата на демократијата, економскиот развој и владините активности. Сите три категории моментално се на историски ниско ниво.

Но, Сабине Донер не сака да очајува и покрај сите негативни извештаи. Таа забележува дека расте свеста во воспоставените демократии дека светот станува се помалку слободен: „Во последните две до четири години, граѓаните и владите, демократиите, вклучително и кај нас овде во Германија, станаа повнимателни за предизвиците што произлегуваат од автократијата. И овие предизвици се значително посилни од пред десет години. Но, мислам дека тоа е наша сопствена вина“, додава таа.