1-ва Скопска - МТМ Телевизија

Градоначалникот на општина Центар, Горан Герасимовски, информира дека новата градинка „Пролет“, која е прва по пет децении, е изградена по највисоки светски стандарди за поквалитетен престој на дечињата и подостоинствени услови за работа на вработените.

„Градинката ‘Пролет’ е прва во населбата Пролет и прва по 50 години во општината. Таа е енергетски ефикасна и модерна, која треба да обезбеди опфат на 173 деца, сместени во 9 занимални. Се гордеам што инклузивноста и пристапноста на децата со попреченост е воспоставена во проектот на градбата. Градинката ќе располага со лифт и надворешно игралиште, до кое може да пристапат и деца со попречености. Изградбата се одвиваше според предвидената динамика, брзо и непречено. Во март се надевам дека дечињата од населбите Пролет и Маџир Маало ќе бидат згрижени во оваа предучилишна установа“, рече Герасимовски.

Новата градинка „Пролет“ има вкупна бруто-површина од 3.276 квадратни метри и целосно е финансирана од Општина Центар во висина од речиси 2,5 милиона евра.