1-ва Скопска - МТМ Телевизија

Со 26 гласа „за“ Трајко Славевски од ВМРО-ДПМНЕ е избран за претседател на Советот на Град Скопје.

За Славески гласаа советниците на ВМРО-ДПМНЕ, Левица и Алијанса за Албанците/Алтернатива, како и двајцата советници на коалицијата ЛДП ДОМ.

Новиот претседател порача дека Советот е составен од квалитетни професионалници и ќе мора да работи за да ги подобри условите за житвот на сите граѓани на Скопје.

Славески додаде дека Советот ќе дава поддршка на градоначалничката Данела Арсовска, но истовремено ќе ја контролира нејзината работа и работата на јавните претпријатија и институции во надлежност на Град Скопје.

Конститутивната седница се одржа во МКЦ, кино „Фросина“, а се верификуваа мандатите на новите 45 советници.

Градоначалничката Данела Арсовска им посака успешна работа во следните четири години.

„Во оваа група на советници имаме луѓе кои се од различни профили, кои доаѓаат од политиката, од граѓанскиот сектор, меѓутоа мислам дека сите вие имате свои квалитети како личности и професионалци што многу ќе придонесе за зголемување на квалитетот на работењето на Советот на Градот Скопје во наредните 4 години. Од мое име како градоначалничка на Град Скопје посакувам успешно да соработуваме во наредните 4 години, а од името на скопјани ви благодарам што ќе се залагате за нивните интереси“, кажа градоначалничката Арсовска.

Советот на Град Скопје најпрво ги избра претседателот и членовите на Комисијата за верификација, мандатни прашања, претставки и поплаки на Советот на Град Скопје. Потоа Комисијата ги верификува мандатите на советниците на Советот на Град Скопје од локалните избори. По верификацијата на мандатите, се одржа расправа при што беше избран новиот претседател на Советот.