1-ва Скопска - МТМ Телевизија

Градоначалникот на општина Аеродром, Тимчо Муцунски, на својот фејсбук-профил објави дека според последната одлука на Уставниот суд, сите носители на јавни функции ќе добијат зголемување на својата плата, а разликата во покачувањето тој ќе го донира во хуманитарни цели на семејствата со ниски месечни примања и за семејствата на уставобранителите.

Муцунски истакна дека одлуката е донесена од највисокиот орган што ја штити уставноста во Македонија и е одлука што мора да се почитува, но разликата може да се донира.

„Јас сум растен, воспитуван и образован во духот на позитивни вредности. Сметам дека меѓусебната поддршка и помош се важни. Среќата не зависи од тоа колку имаме, туку од тоа колку можеме да помогнеме и да направиме за другите“, напиша Муцунски на својот фејсбук-профил.

Тој воедно ги повика и другите носители на јавни функции од сите политички партии да го следат неговиот пример.

„Имајќи ја предвид тешката економска и финансиска состојба во која живееме, почнувајќи од следниот месец, разликата во платата ќе ја донирам за хуманитарни цели. Ова е само мал гест од моја страна, кој се надевам дека ќе помогне на голем број семејства што секојдневно се борат со разни предизвици и се справуваат со економски, финансиски и здравствени проблеми. Воедно, ги повикувам и другите мои колеги од сите политички партии, доколку се во можност, да го следат овој пример“.