1-ва Скопска - МТМ Телевизија

На Тајланд денеска стапи во сила законот за легализирање на истополовите бракови, а стотици парови во земјата се венчаа на јавни прослави.

Свадбите, меѓу другото, се одржаа во еден од најголемите трговски центри во Бангкок, на прослава организирана од градските власти, јави Би-би-си.

Во главниот град беа поставени кабини за фотографирање и бесплатни колачи, а една населба во Бангкок дури нудеше и бесплатни авионски билети на првиот пар што ќе се венча во таа општина.

Тајландскиот Закон за еднаквост во бракот има цел да им даде целосни правни, финансиски и медицински права на ЛГБТК+ паровите.

Партнерите ќе имаат еднакви права и одговорности во постапувањето со заедничкиот имот, даночните обврски и одбитоци, наследните права и семејните бенефиции.

30-ина земји во светот легализираа некаква форма на истополови бракови, од кои повеќе од половина се во Европа.